拜仁慕尼黑喺德甲地位崇高，不过唔系个个球员都会得到优待，塞内加尔国脚保拿沙亚日前喺社交网爆料，话自己喺德国机场受到无礼对待，被当成「毒贩」扣留2个钟头，保拿沙亚仲将2名德国海关换上小丑头像讽刺，指控佢哋种族歧视。

30岁嘅保拿沙亚表示：「我喺机场等紧行李，突然有海关带埋缉毒犬嚟搜查，将我当成『唔乾净』或者『毒贩』咁看待，然後就话系例行公事。当我喺所有乘客面前作出反应，佢哋就将我带去一间冇人见到嘅房间，然後搵嘢嚟屈我，证明佢哋冇做错，我无端端被扣留2个钟头。我问自己，我几时先可以将呢度当成屋企？呢啲事(种族歧视)一定要停止。」

保拿沙亚2年前由马赛加盟，但只系大後备，今季仍然未有机会落场，对於呢位塞内加尔国脚嘅指控，德国海关否认有种族歧视，指保拿沙亚未有为一只名贵手表作出申报。