今夏由阿积士加盟多蒙特嘅施巴斯坦贺拿，不幸喺开季前被验出患上睾丸癌，呢位28岁前锋经过手术及化疗之後，已经成功战胜癌魔，身体状况亦恢复得七七八八，并准备重新投入操练。

施巴斯坦贺拿效力阿积士期间，上阵66场入47球，包括上届欧联有11球进帐，所以多蒙特今夏斥资3,100万欧元收购呢位科特迪瓦国脚，代替离队嘅艾宁夏兰特，点知佢喺季前集训时，被验出患上睾丸癌，球员生涯几乎毁於一旦。

幸好施巴斯坦贺拿及时获得医治，现时已经冇大碍，由於贺拿现时喺荷兰养病，佢曾经询问阿积士教练舒鲁达，希望到呢支荷甲劲旅嘅基地参加训练，对方亦好欢迎，施巴斯坦贺拿距离重返球场又行近一步。