周一(7日)凌晨意甲大战，祖云达斯回勇，主场以2比0击败国际米兰，21岁中场新星法基奥利连续2场联赛入波，佢透露一直有研究祖记名宿迪比亚路嘅射波技巧，所以有今时今日嘅成绩。

双方上半场互无纪录，换边之後，祖云达斯中场菲腊高斯迪发挥助攻王本色，52分钟左路快放传中，由拉比奥特射入。拉比奥特成为祖记第3位喺意甲射入国米大门嘅法国中场，另外2位正系球王级嘅柏天尼同施丹。

战至84分钟，菲腊高斯迪横传畀法基奥利射成2比0，呢位意大利U21小国脚继上轮意甲对莱切，射入全场唯一入球後，又再次建功。

赛後法基奥利自爆入波秘诀，就系向2位前祖记名将偷师：「我细细个已经研究迪比亚路射波技巧，近年喺操练时经常睇保罗戴巴拿射门，佢入过好多波，从佢身上获益良多。」

祖云达斯取得联赛4连胜，兼不失球，升上第5位，仅落後第3位拉素及第4位阿特兰大2分，重新加入争前4位行列。

同日另1场大战「首都打吡」，拉素凭菲腊安达臣入波，以1比0击败罗马。