C朗接受名嘴皮尔斯摩根访问震撼全球，葡萄牙集合期间，有片段流出般奴费南迪斯到场，准备同C朗握手时，两人表情僵硬，气氛尴尬。

C朗拿度近日成为焦点，因为佢接受皮尔斯摩根内容开始流出，稍後将有足本片段公布，讲佢数臭曼联详细内容，全球哄动，曼联发声明回应指C朗违规接受访问，并对球会造成损害予以追究，将罚款100万镑，彼此关系恐怕无法挽回。

呢段时间，葡萄牙国家队开始集结，身为队长嘅C朗拿度如常归队，准备第5次征战世界盃，佢归队期间有专人拍摄，在网上流传影片所见，般奴步入更衣室，先与好友撞拳打招呼，然後镜头一转，见到C朗喺更衣室一角，般奴同C朗打招呼，而C朗亦伸出友谊之手，准备同对方握手问好。

从影片所见，般奴呢次打招呼态度颇为冷淡，两人短暂交谈，而C朗握手後表情僵硬，似乎有啲愕然，般奴亦快速离开冇再同C朗一齐。

影片虽然只有短短数秒，但讯息量大，专访出街後，C朗变咗生人勿近，般奴似乎惊咗佢，毕竟般奴都系打紧曼联，依家风头火势，明显有心疏远C朗，但两人仍要在世盃并肩作战，如果面左左，对葡萄牙争胜绝非好事。