今晚欧国盃16强重头戏，法国火并比利时。法国虽有王牌基利安麦巴比复出，但老拍档基沙文同基奥特各有问题，令「麦总」成众矢之的，对手易於防范；比利时方面箭头卢卡古出晒名「败家」，更加信唔过，加上淘汰赛场合大家都稳阵行先，宁捧2.5球入球细。

法国近年大赛成绩稳定，「三基」基利安麦巴比、基沙文同基奥特於中前场合作无间，不过基奥特年事已高沦为後备，主帅迪甘斯亦不满基沙文逼抢欠积极，上场对波兰冇得担正，甚至有传基沙文唔妥「麦总」做队长，两人面和心不和。

讲到尾法国最具威胁都系麦巴比，首仗赢奥地利就系靠佢制造乌龙波，不过「麦总」喺嗰场整伤鼻骨，次轮对荷兰冇落场，上仗对波兰复出虽然操刀12码建功，取得佢喺欧国盃首个士哥，但大部分时间被对手严密看管 ，搞到冇啖好食，临尾仲被波兰逼和，只能次名出线。睇番「高卢雄鸡」3场分组赛入得两粒，其他队友明显支援唔够，场场靠「麦总」单天保至尊确难搞。

另边厢比利时亦唔好得几多，佢哋喺死亡E组4队同得4分下，同以次名晋级。当中尾轮对住乌克兰，尾段怕输全军缩後，虽然闷和对手出线，但毫无劲旅风范。

「流量密码」卢卡古创造3项羞耻数据，3场分组赛3次食诈胡、6次错失黄金机会、7次射中目标但零入球，嘥晒队长奇云迪布尼多番妙传。再者踏人淘汰赛，双方预计会踢得更谨慎，法国近4场都系1球起、2球止，比利时近3仗亦全开2球或以下，入球细捧得过。