西超盃输波後，宾施马续约皇马出现变数，消息指该法国前锋迟迟未与「银河舰队」达成协议，另边厢C朗所属嘅沙特阿拉伯球队艾纳斯开出高薪利诱，令宾施马可能踢埋今季离队，转战沙特同C朗再合作。

皇马专属记者Edu Aguirre表示：「宾施马嘅动向仍未确定，佢曾拒绝过皇马1次，从多方面消息，以及我对宾施马嘅睇法，佢好可能会转换新环境，就好似2018年嘅C朗，等到欧联夺冠後合约到期，最後自由身离队。」

西超盃赛前，呢位金球奖得主对於自己去留态度不明：「我只想专注目前比赛，唔知会喺皇马踢到几时。」有猜测指，皇马对老将只会续约1年，而且年薪大幅下调，令宾施马仍未动笔。

与此同时，宾施马收到来自艾纳斯嘅巨额合约，转战沙特更将与C朗再度合作，何况佢已经35岁，已达成金球奖心愿，又错失咗世界盃，生涯最後阶段去沙特挖金系唔错嘅选择。