曼联班主格拉沙家族上年11月宣布计划将红魔鬼卖盘之後，唔少财团有兴趣接货，大热买家英国首富拉特克利夫正式确认，加入竞争收购曼联，旗下团队已经展开相关工作，力争今季英超结束前入主红魔鬼。

据悉曼联将於2月开始进行卖盘程序，接受各大买家报价，现年70岁嘅拉特克利夫身家达150亿镑，佢一直都系红魔鬼球迷，英国《泰晤士报》指拉特克利夫已经拍板，要从美国富商格拉沙家族手上买走曼联。

拉特克利夫嘅发言人亦承认的确有其事：「我哋已经正式展开相关收购工作，拉特克利夫知道曼联对於曼彻斯特嘅重要性，我哋认为球会系时候重新开始。」除咗拉特克利夫之外，盛传来自美国及中东嘅财团都有兴趣收购曼联。

格拉沙家族2005年以借贷方式用8亿镑收购曼联，令球会负债累累，加上着重商业营运多於发展足球嘅方针，多年来一直备受球迷批评，要求格拉沙家族下台嘅声音此起彼落，2021年5月更发生过「占领奥脱福」事件，格拉沙家族上年11月终於决定卖盘，希望将曼联以50亿镑出售。