英超赛会周一(6日)起诉曼城超过100条关於财政问题嘅控罪，即时成为球坛热话。英国《太阳报》报道，英超各队乐见曼城被「狙击」，联合要求英超要作出严惩，如果曼城被证实有违规行为，必定要判以降班极刑，而且处罚要喺今季执行。曼城领队哥迪奥拿亦被翻旧帐，佢曾承诺如果球会有欺诈行为，佢会主动辞职。

英超赛会今次行动，据报早系曼城意料之内，球会已经准备好大批资料嚟应对，不过一众英超球会就企晒喺英超嗰边，并要求英超赛会要快手同辣手，其中一间球会高层向《太阳报》表示：「如果呢啲控罪成立，处分一定要合理，而唯一合理做法就系罚曼城降班，依家讲紧系接近10年嘅造假，英超一定要做正确嘅事。」

曼城嘅运作喺英超一直唔受欢迎，欧洲足协喺2020年曾控告曼城违反财政公平原则(FFP)，罚禁踢2年欧洲赛事，但之後喺国际体育仲裁法庭(CAS)被推翻，当时报告就证实有9间英超球会联合要求处分曼城，当中包括利物浦、曼联、阿仙奴、车路士、李斯特城、纽卡素、热刺、般尼同狼队。

英国《每日镜报》报道，曼城今次面对嘅挑战，比起3年前受到欧洲足协指控更难搞，因为曼城当时向CAS上诉成功，其中一个关键系唔少证据已经「过期」，但英超赛会并冇就任何证据设立追溯限期，意味会有好多新证据出现要曼城拆解。

曼城前途未卜，不过领队哥迪奥拿就被网民翻旧帐，佢喺3年前曾公开表示：「我叫球会就指控讲个真相畀我知，我对佢哋系100%信任，我话如果你哋有讲大话，第2日就唔会再见到我，亦唔再系我嘅朋友，我想代表一间做事光明磊落嘅球会。」