曼联新人王救命波反胜 英足盃入8强斗富咸
2023-03-02 来源: 八一体育 点击
3日前捧英联盃冠军嘅曼联,周四(2日)凌晨英足盃第5圈惊险过关,凭尾段爆发喺90分钟连入2球,主场3比1反胜韦斯咸杀入8强,距离「4冠王」美梦又行前一步。英足盃8强抽签,曼联继续喺奥脱福出击迎战富咸,而且8强入面只有4支英超球队,「红魔鬼」捧盃机会唔细。
曼联今场收起部份主力,卡斯米路、拉舒福特、利辛度马天尼斯等都先任後备,半场演出明显走样,作客嘅韦斯咸攻势更加入肉,若非迪基亚勇救米查利安东尼奥单刀,曼联半场可能会先落後。曼联领队坦哈格见势色唔对,半场换入卡斯米路加强中场,但54分钟仍被宾华马世界波攻陷。
失守後曼联再换入拉舒福特,攻势果然大大提升,尾段更加大爆发,77分钟阿古特喺角球摆乌龙为曼联追平,90分钟阿根廷新星加拿祖禁区左路妙射熨入远柱,助「红魔鬼」绝地反胜,费特喺补时5分钟再入1球锁定胜局,曼联惊险赢3比1晋级。
18岁嘅加拿祖今场再做「关键先生」,今场系佢今季第10次正选上阵,4个入球当中有3球系致胜球,坦哈格赛後大赞佢已经系正选材料:「赛前我同加拿祖讲,佢後备入替影响力大,依家系时候证明自己可以踢正选,佢有脚法、有速度兼有胆识,仲可以跑足120分钟,我认为佢已经有能力担正。」
英足盃8强只系得番4支英超球队,曼联将会喺主场迎战富咸,曼城就主场对般尼,另外2仗系白礼顿对甘士比同埋锡菲联对布力般流浪,赛事会喺2个星期後上演。
相关阅读
- 03-02菲尔科顿谷底反弹 英足盃起孖率曼城入8强
- 03-02王者曼联今晚又登场 出战英足盃
- 03-02堤亚高施华重伤抖6周 朴达生死战唔关佢事
- 03-02孙兴民骚完美身材 队友踢爆:佢P图
- 03-02利物浦防线曳 博狼队先入波
- 03-02运动视界啪EP.126-收贿、歧视与权斗,我们该从
- 03-02【2022年卡达世界盃】什麽是越位?
- 03-02冇悬念!C朗获选沙特2月最佳球员
更多>>精选阅读