近期战绩低迷嘅车路士，周二(28日)宣布巴西中坚堤亚高施华膝部韧带受伤，预计要休息长达6个星期，呢位38岁老将系车路士今季上阵时间最多球员，亦公认系球队今季最佳球员，嚟紧2场据报系领队朴达「命运之战」，堤亚高施华缺阵影响极大。

堤亚高施华喺上场对热刺伤出，检查後证实膝部韧带受创，车路士虽然冇讲佢要抖几耐，但英国传媒就指养伤时间约6个星期。近日有消息指，车路士周六(4日)对列斯联同下星期欧联对多蒙特2仗，将会决定领队朴达嘅帅位，作为必然正选嘅堤亚高施华呢个时间受伤，无次系极大打击。

有趣嘅系，堤亚高施华老婆Belle早前喺社交网，赞好一段批评朴达领军能力嘅贴文，有传车路士球员对朴达嘅执教都好不满，依家堤亚高施华专心养伤，嚟紧1个星期就食住花生睇朴达造化啦！