西维尔夺得欧霸盃冠军，後备上阵嘅拉美拿喺互射12码阶段主射命中，功不可没，呢位31岁阿根廷国脚曾经喺国家队及球会赛事，总共6次屈居亚军，包括效力热刺期间3次做「阿二」，今次终於打破宿命，一尝冠军滋味。

被热刺外借去西维尔嘅前锋拜恩基尔亦有奖牌落袋，难怪网民趁机抽水，指热刺射手哈利卡尼一定好羡慕呢2位前队友。

西维尔可以打入欧霸盃决赛，拉美拿、拜恩基尔有好大功劳，特别系4强次回合加时，2人合作为球队攻入致胜1球，淘汰祖云达斯，拉美拿该仗入1球及1次助攻。呢位中场曾於2013至21年效力热刺8年，2次获得英联盃亚军，以及2019年欧联亚军，2年前转投西维尔，迎来职业生涯第一个冠军。

至於年仅22岁嘅拜恩基尔出身西维尔青训系统，球队3年前夺得欧霸盃冠军，佢都有奖牌，2年前转投热刺，但不受重用，今年1月被外借返西维尔，今仗欧霸盃决赛踢正选，年纪轻轻已经第2次捧盃。

反观，哈利卡尼喺热刺奋斗咗14年，仍然未捧过盃，网民建议佢尽快离开热刺，以免抱憾终生。