近期是非多多嘅曼联，周日(10日)宣布安东尼马菲奥斯延迟归队後，领队坦哈格周一(11日)又要处理同查顿辛祖嘅纷争，据报两人将会喺「反面」後首次会面，不过消息指双方都态度强硬，查度辛祖仍然将反击坦哈格嘅贴文喺社交网置顶，似乎无意跪低。

曼联上场联赛输畀阿仙奴後，坦哈格指查顿辛祖未入选大名单系「训练态度有问题」，查顿辛祖随即发声明反击，批评坦哈格「讲大话」，弃用佢系「另有原因」，而且一直搵佢做「代罪羔羊」，言辞激烈。曼联喺对阿仙奴後全队放假，未有国际赛任务嘅球员周一会报到，亦会系坦哈格同查顿辛祖喺争执後首次见面。

英国《每日电讯报》消息指，今次会面将决定查顿辛祖嘅命运，消息指坦哈格对球员嘅强烈反应感到震惊，因为坦哈格原意系想激发查顿辛祖斗志，估唔到佢会疯狂发炮，而查顿辛祖至今仍然将反击声明「置顶」，显示佢冇打算退让。传闻曼联将喺1月放走查顿辛祖，多蒙特有意重新接收呢位翼锋。