乌克兰新星梅迪历原本被视为「未来金球奖」人选，不过1月加盟车路士後愈踢愈颓，上场欧国外为乌克兰对英格兰亦出晒丑，面对33岁嘅基尔获加被Mark到一戙都冇。据《The Athletic》报道，梅迪历沉沦最大原因，系佢太过沉迷做Gym同打机！

梅迪历年初高价转会车路士後，踢咗18场仲未入过波，被球迷称为「世纪水货」。《The Athletic》日前报道，梅迪历训练相当落力，一有时间就去做健身，而车路士教练团认为，梅迪历因为「过度健身」而影响体型同踢法，甚至更加容易受伤，所以车路士已勒令佢减少去做Gym嘅时间。

另一个问题系，梅迪历嚟到伦敦後因为人生路不熟，所以花咗好多时间去打机，除咗操练同做Gym之外，佢大部份时间都系同乌克兰嘅朋友玩电脑射击游戏《CS:GO》，并唔主动去融入英国嘅生活，亦拉长佢嘅适应期。