埃及足总周一(22日)凌晨证实，上场非国盃受伤嘅穆罕默德沙拿，已提前回归利物浦接受治疗，不过如果埃及顺利杀入4强，而呢位前锋又及时康复，佢将会再飞科特迪瓦为埃及出战。

沙拿喺第2场分组赛受伤，检查後证实大腿肌肉拉伤，未来2场赛事肯定唔踢得，埃及足总声明表示：「沙拿将飞返英国接受治疗，目标系如果埃及晋身4强，佢可以再次归队。」

呢个安排对利物浦无疑系好消息，一来沙拿嘅伤势似乎唔算严重，二来如果沙拿真系缺阵2场就康复，以埃及今届演出，入唔入到4强都好令人怀疑，变相沙拿复出可以即时投入利物浦赛事。

「红军」领队高普亦好满意呢个安排：「如果沙拿喺非国盃决赛前康复，应该会去参赛，但如果决赛前已有『定局』(埃及出局)，咁我就唔知啦！目前嘅安排系咁样，沙拿返嚟养伤系好合理嘅做法。」