安东尼马迪尔想离队，已经唔系新鲜事，早前甚至爆出罢踢风波，不过佢想1月转会窗离队嘅意愿，至今未能实现，经传媒查探终於搵到原因，一切都系曼联开价太高，借用马迪尔5个月，竟然要使成1000万镑，搵笨咩！

意大利《慢镜头》报道，列出曼联外借该法国前锋条件，就系先收500万镑借用费，再承担马迪尔全部人工，即周薪高达25万镑，比赛至季尾，总计又要用多500万镑，两条数加埋，借用马迪尔嘅总支出系1000万镑，到借用期满，曼联就会将马迪尔收番己有。

呢个条件，各支有意借用马迪尔嘅球会都认为太贵，其中祖云达斯表明，如果曼联唔肯减价，斟介就告一段落，至於英超巨富球会纽卡素，亦对呢个价钱感到犹豫，因为实在贵得唔合理。

曼联本身做惯水鱼，但今次佢哋搵人接货，却搵唔到水鱼，曼联已有两手准备，就系要求看守领队兰历克同马迪尔改善关系，皆因早前罢踢风波，令将帅之间出现裂痕，如果马迪尔留队，兰历克就要谂办法点同球员相处。