据瑞士着名体育研究机构CIES（足球天文台）调查，当今欧洲最佳U21球员排名，阿仙奴新星布卡约沙卡大热当选，不过因涉嫌强奸、谋杀恐吓等罪名嘅格连活特，仍然排喺次名，反而祖迪比宁咸只排第24位。

足球天文台统计欧洲32个联赛嘅数据，计算用波、效率、拦截、射门等各种能力，排出当今100大欧洲最佳U21球员，结果20岁嘅沙卡高踞榜首。沙卡今季喺阿仙奴已有10个入球，亦系英格兰国家队稳胆之一，前途无限。

不过，因官非缠身而消失2个几月嘅曼联青训格连活特，仍然喺榜入面排第2位，压倒比勒费尔德嘅奥地利新星柏德列温马。英国《太阳报》指英国警方就格连活特嘅控罪已提交报告，日内就会决定系咪正式落案起诉。

沙卡嘅阿仙奴队友加比尔马天尼利排喺第14位，而多蒙特中场祖迪比宁咸只排24位，令人意外。

欧洲最佳U21球员TOP 10

1 沙卡(阿仙奴)

2 格连活特(曼联)

3 柏德列温马(比勒费尔德)

4 加华度尔(RB莱比锡)

5 米高奥利斯(水晶宫)

6 轩格比(利华古逊)

7 卢克巴(里昂)

8 干卡路(宾菲加)

9 历高威廉斯(毕尔包)

10 佐真尼奥鲁达(贺芬咸)