法兰基迪庄转会风波再有新发展，据西班牙传媒报道，巴塞隆拿教练沙维同法兰基迪庄会面後，就留队方案有「满意进展」，传闻呢位荷兰国脚将同意减薪50%，而沙维更表示新球季考虑将法兰基迪庄转去踢中坚！

西班牙《阿斯报》报道，沙维同法兰基迪庄喺美国进行会面，沙维向佢解释球队处境，表明个人希望法兰基迪庄留低，但如果要巴塞成功留人，法兰基迪庄就要答应减薪50%，报道指会议结束後，双方都觉得「满意」，令留队机会大大增加。

法兰基迪庄近期为巴塞踢热身赛，後备上阵都系踢中坚，有传沙维系故意唔畀佢踢中场，沙维就否认：「我冇谂过咁做(逼走法兰基迪庄)，我好锺意佢，佢喺中坚位可以为球队带嚟贡献，我几锺意佢踢呢个位置。」

事实上，法兰基迪庄喺阿积士有一段时间拍住马菲斯迪历特踢双中坚，喺朗奴高文执教巴塞隆拿期间，亦曾经客串踢3中坚入面嘅自由人，所以佢对中坚位置并唔陌生。