由摩连奴执教嘅罗马，上季勇夺欧协联冠军後即大展拳脚，今夏成功签入自由身嘅阿根廷前锋保罗戴巴拿，令球迷非常兴奋。保罗戴巴拿嘅人气爆灯，据报佢件21号波衫大卖，甚至打破埋C朗拿度保持嘅意甲纪录。

据意大利《罗马体育报》报道，保罗戴巴拿件21号波衫即成球迷抢购目标，虽然每件波衫价格110欧元(约880港元)至130欧元(约1,040港元)，但首日销量仍然破晒纪录！报道指意甲历来波衫开售排名(只计官宣首日)，保罗戴巴拿已超越C朗喺2018年加盟祖云达斯嘅纪录。

保罗戴巴拿加盟後，「罗马王子」托迪曾主动表示愿意畀佢着10号波衫，不过呢位阿根廷前锋就拒绝，认为10号仍然属於该罗马传奇前锋，但保罗戴巴拿亦唔排除将来会改着10号。