西甲劲旅巴塞隆拿近期透过2次变卖资产，令球会财政逐步稳定，转会市场上亦意外成为大赢家。据报巴塞已经同西维尔达成协议，将以6,000万欧元签入法国中坚祖利斯古迪，再一次喺车路士口入面抢走猎物，呢位23岁新星喺周一(25日)热身赛并冇为西维尔上阵，为加盟巴塞做准备。

因财政问题受到财政限制嘅巴塞，今夏已经签入拉芬夏比洛尼、罗拔利云度夫斯基、基斯尔同安达斯基斯坦臣等球星，今次佢哋出价5,000万欧元，另加1,000万欧元奖金条款，虽然出价低於车路士嘅6,500万欧元，但巴塞就答应「一炮过」全额支付，而唔系车路士嘅分期付款，最终获西维尔接纳，祖利斯古迪将会签约4年。

车路士同巴塞今夏转会市场多次「埋牙」，结果系巴塞大获全胜。车路士月初力斟巴西翼锋拉芬夏比洛尼，开价6,500万欧元已获列斯联接纳，但拉芬夏就一心要去巴塞，结果等到巴塞筹钱成功，一出手就成功截劫；法国翼锋奥士文尼迪比利，原本亦系车路士希望自由身引入嘅球员，但呢位球星最终亦选择续约巴塞。

除此之外，巴塞更想挖角车路士後防双星艾斯派古达同马高斯阿朗素，但目前就转会费问题拉锯，车路士周日(24日)热身赛吞阿仙奴4蛋後，领队杜曹就唔点名批评有球员「个心已经唔喺车路士身上」，矛头直指艾斯派古达同马高斯阿朗素。值得一提，丹麦中坚安达斯基斯坦臣，今夏亦拒绝续约车路士，自由身加盟巴塞。