周六晚（30日）举行嘅酋长盃，东道主阿仙奴凭住「耶稣仔」加比尔捷西斯大演帽子戏法，喺主场大胜西维尔6比0，捧盃之余，亦为即将开锣嘅英超造势。

阿仙奴於赛前正式任命中场马田奥迪加特为新队长，今仗刻意排出强阵，为嚟紧周六凌晨英超揭幕战作客水晶宫做准备，开波仅10分钟布卡约沙卡博到12码，佢亲自操刀先开纪录，冇耐加比尔捷西斯两番门前射入，加上沙卡整多粒，开波唔够20分钟已领先4比0。

易边後阿仙奴都系控制战局，去到77分钟「耶稣仔」於混战中快脚一笃破网，连中三元，完场前後备上阵嘅尼基迪亚埋斋，最终豪赠西维尔6蛋捧盃。唔计闭门友赛，阿仙奴於季前5场热身赛全胜，先後勇夺佛罗里达盃同酋长盃，「耶稣仔」更入咗7粒，极速融入，睇嚟今季靠晒佢数胡。