80岁费格逊据报加入曼联智囊团，垂廉听政指点江山，周五(29日)佢又高调出巡，到英国古活马场观看佢爱驹Paddy's Day出赛，期间佢同骑师戴图理相遇，仲对住追捧阿仙奴多年嘅戴图理讲笑咁话：「阿仙奴今季降班！」

虽然费Sir爱驹呢场赛事跑第8名，冇得影威水相，但呢日佢心情似乎唔错，并无被曼联嘅「C朗之乱」激亲，喺马场见到骑师戴图理，立即上前揽头揽颈，相当亲热。

戴图理另一身份系阿仙奴球迷，但佢同身为马主嘅费Sir亦关系友好，今次费Sir就搵阿仙奴嚟讲笑：「阿仙奴今季会降班，系佢哋话畀我听！」戴图理听到後都冇嬲，仲笑得好开心添。

不过费Sir似乎忘记咗，曼联上季成绩仲差过阿仙奴，阿仙奴斗到最後阶段先痛失欧联资格，仅列第5，但曼联早就与欧联席位无缘，仅得球会英超史上最差嘅第6名，两队都只能参加欧霸。

再讲今夏增兵，阿仙奴签入加比尔捷西斯同辛真高，实力加强咗唔少，反观曼联增兵处处碰壁，签到最似样嗰个系基斯甸艾历臣，讲到边队降班，费Sir真系要小心回力镖！