利物浦中场阿历士张伯伦早前热身赛对水晶宫，勇战受伤，唔止肯定缺阵周日(31日)凌晨社区盾对曼城，而且仲需要休息一段长时间，由於呢位28岁英格兰国脚只剩下1年合约，预料即使佢之後复出，亦难以获得续约。

利物浦对曼城前夕，红军领队高普透露阿历士张伯伦嘅伤势：「阿历士有严重筋腱伤患问题，需要缺阵一段时间，但并唔需要做手术，我哋有唔少球员都试过呢个位置受伤，实在系一种令人讨厌嘅伤患。」

阿历士张伯伦近年长居後备，早已经传出今夏可能离队，包括韦斯咸有兴趣签佢。不过，阿历士张伯伦今次受伤之後，恐怕会吓退潜在买家，好大机会等明夏自由身走人。