C朗曾经受万民景仰，属於奥脱福之神，佢上年夏天回巢，被寄予厚望，可以拯救红魔鬼，但经过近期转会风波，加上热身赛对华历简奴提早离场，引起唔少红魔球迷不满，甚至认为今仗已成为C朗喺曼联最後1场比赛。

C朗未完场就不顾球队而去，提早走人，仲要畀人影到，呢张「赌神式背影」相片，立即喺网上疯传，同时激起「反C朗」情绪，纷纷认为佢将会离开曼联，有人话：「可能今场系最後1次见C朗喺奥脱福出现，实在令人感到羞耻。」

立即有网民附和：「无错系佢最後1场。」另一位仁兄更加话，已经唔当C朗系曼联一部份。

C朗早前喺社交网发文话：「周日王者上阵。」表明复出对华历简奴，但佢今场未完场已走人，有花生友趁机寸佢：「王者已经走咗。」

C朗同曼联及球迷嘅关系全面恶化，离队可能成为佢唯一出路，但拜仁慕尼黑、车路士、皇马、马体会、巴黎圣日耳门等大球会，都表明唔会签佢。如果C朗想转投一支有份踢来届欧联嘅球队，最大机会系重返母会士砵亭。