巴西球星安东尼马菲奥斯加盟曼联，第1场波就成为赢波英雄，闪电俘虏一众「魔迷」欢心。呢位翼锋唔单止踢法娱乐性十足，就连庆祝都有「巴男4式」，佢对阿仙奴先开纪录後，一次过做齐「拍队徽」、「手指天」、「扮猎豹」同埋「啜手指」4款庆祝动作，似乎仲有大把货卖！

作为第100个喺英超上阵嘅巴西球员，安东尼系当中最年轻嘅首演入球者(22岁192日)，原来今场仲有巴西传奇球星卡卡入场打气，卡卡赛後亦搵旧队友C朗以及一班巴西球员合照，当中唔少得同安东尼两个自拍，并且喺社交网留言：「恭喜你首演成功，上帝祝福你！」

安东尼赛後亦喺社交网发文表示：「神奇嘅一日！非常多谢曼联嘅职员同队友，我永远唔会忘记呢一日！曼联球迷，你哋嘅欢迎令我非常感动，依家只系开始，我哋要追求更多！」