罗马喺今轮意甲突然崩溃，作客0比4大败於乌甸尼斯脚下，创下摩连奴喺意甲最大败仗，不过「寸王」点会咁易认输，佢赛後就话「输1场0比4好过4场0比1」，果然系输人唔输阵。

摩连奴曾於2008至2010年执教国际米兰，去年重返意甲执教罗马，喺意甲输0比4系第一次，不过佢执教生涯唔系未试过大败，最大败仗系2010年皇马0比5输畀巴塞隆拿，而英超亦试过2016年曼联0比4不敌车路士，去年喺欧协联分组赛，更曾以1比6大败於波杜基林特。

「寸王」每次输波都会弹球证吹得唔好，不过由於今场输得太多，佢都唔再批评球证，反而集中讲吓今场嘅比数：「我宁愿输1场0比4，都唔想输4场0比1，因为我哋只系冇咗3分，输波好难接受，但生活还是要继续，当你输到0比4，再讲球证吹成点只系笑话，我哋星期四仲有比赛，必须尽快抬起头向前看。」