法国中场保罗普巴世盃梦危！呢位29岁中场季前热身受伤後，周一(5日)喺祖云达斯复操再次「出事」，球会宣布即时安排佢进行手术根治膝伤，目前未知休息时间要几耐，但祖记教练阿里基就表示预计普巴明年1月先至归队，意味佢好大机会错过11月展开嘅卡塔尔世界盃。

祖云达斯教练阿里基周一宣布：「普巴今朝尝试第2次操练，但好快就停止，我哋之後决定安排佢做手术。」祖记随後发声明，指普巴嘅关节镜半月板手术非常成功，但未透露实际养伤时间，意大利《天空体育》报道，普巴最快只要6个星期就可以复出，但早前有报道指佢一旦做手术，将要缺阵4月个，所以普巴受伤後一直采用保守疗法，非不得已都唔做手术。

阿里基被问到普巴踢唔踢到世界盃，佢就表示：「佢踢唔踢到世界盃唔关我事，但喺祖云达斯嘅角度，我哋预计佢明年1月回归。」阿里基言论暗示普巴喺今年都冇机会上阵，同「养伤4个月」嘅讲法更加脗合。意甲会喺11月13日暂停，让路世盃决赛周，衞冕嘅法国会喺11月23日登场对澳洲。