周四(6日)凌晨欧联G组赛事，西维尔主场1比4惨败多蒙特脚下，卢比迪古带完呢场後会被炒鱿嘅消息赛前已经「通天」，结果亦跟足剧本进行，西维尔完场後发声明宣布易帅，消息指阿根廷名帅森柏奥利即将会接手。

《ESPN》消息指西维尔日前同森柏奥利倾掂数，所以卢比迪古带埋今场欧联就会落镬，西维尔面对多蒙特亦全无招架之力，上半场已经连失3球，最终输1比4完场，依家喺G组3战只得1分，出线机会相当渺茫。

虽然卢比迪古被炒，但佢曾经带领球队赢欧霸盃冠军，仍然受到球迷拥护，完场後主场球迷齐齐起立鼓掌，向卢比迪古作「最後致敬」。呢位西班牙教头赛後表示：「要离开一支我深爱嘅球队系痛苦同伤感，我已经同球员道别，唔想讲尊唔尊重嘅问题，我感激西维尔畀我嘅一切。」传闻卢比迪古获英超球会狼队斟介，有望闪电落班。