曼城前锋艾宁夏兰特今季疯狂入球，被视为当今最强前锋，虽然佢加盟曼城只系几个月，但西班牙媒体就爆料，指艾宁夏兰特终极目标系效力皇家马德里，而佢合约内更有「皇马条款」，容许皇马出价收购，不过曼城领队哥迪奥拿已立即出面否认。

西班牙《机密报》报道，夏兰特今夏同曼城签约5年，但当中包含2024年开始启动嘅「皇马条款」，条款指皇马喺2024年可以用2亿欧元将佢买断，到2025年降至1.75亿欧元，类似嘅条款喺夏兰特之前同萨尔斯堡、多蒙特嘅合约都有存在。

曼城喺欧联大胜哥本哈根後，哥迪奥拿就罕有公开回应：「夏兰特合约内冇皇马条款，亦冇同其他球队有关嘅条款，呢啲唔系真实嘅事我有咩好讲？我觉得夏兰特依家好开心，我哋亦会令佢觉得开心，不实传闻我哋控制唔到。」