英格兰老牌球队诺定咸森林今季重返英超，不过班主马连拿基斯嘅管理就受到质疑，佢今个夏天破纪录签入23个新球员，成队波面目全非，结果开季8场只得1胜排包尾，据报球会准备换埋领队谷巴，已经取消之前向佢开出嘅新合约，考虑拉宾尼迪斯接手。

森林今季雄心勃勃，夏天用1.4亿镑签入23个新球员，仲向领队谷巴开出新合约，希望可以大展拳脚，点知球队表现差劲，英国《每日邮报》报道，马连拿基斯已经取消谷巴份新合约，成为「炒鱿」一大讯号，森林下场联赛对维拉，可能系谷巴嘅生死战。

除咗谷巴个帅位危危乎，据报球会首席球探史葛、首席执行官梅菲同资料分析主管施利安奴斯都面临被炒鱿，目前以顾问身份帮手嘅前纽卡素主席查恩尼，有望正式加入管理层，佢嘅加入亦令前纽卡素领队宾尼迪斯上任机会大大提升。