C朗拿度日前作出爆炸性专访，对曼联班主、高职、领队、前球员等疯狂炮轰，曼联官方周一(14日)晚上发出声明，话要了解成件事情来龙去脉先再作回应。不过据英国传媒报道，领队坦哈格同球会高层已召开危机会议，包括谘询律师团队研究点样处理，考虑引用「正当理由」条文将C朗炒鱿，而唔需要作出任何赔偿。

C朗接受皮尔斯摩根访问嘅节目仍未出街，不过部份曝光内容已相当轰动，曼联周一发声明表示：「球会留意到媒体报道关於C朗嘅访问，我哋会先了解全部事实再作回应，球会依家专注准备下半季赛事，延续领队、球员、职员同球迷所建立嘅信心、团结。」

据英国《每日电讯报》消息，坦哈格已同班主祖尔格拉沙及总监、主席等高层、律师开会，商讨点样应对今次危机，「解约」就系其中一个重要议题。喺球坛同多间球会、球员、经理人合作嘅着名律师沙列文喺社交网分析：「经过呢次访问，曼联有足够理据炒C朗，包括破坏合约诚信同令球会陷入不名誉。」

根据国际足协条例，球会同球员有权引用「正当理由」条文解约而唔需要承担後果(赔偿)，沙列文进一步指出，曼联可以扣起支付C朗经理人佐治文迪斯嘅费用，甚至乎「玩嘢」喺解约之後，仍然以索偿为理由继续为C朗注册最多30个月，令C朗无法去第2间球会比赛。

今次访问闹到满城风雨，主角C朗周二(15日)就喺葡萄牙现身，同国家队大军练习备战世界盃决赛周，C朗亦喺IG贴出同队友合照兼留言话：「绝对专注於国家队嘅工作，我哋团结一致，目标只有一个，实现所有葡萄牙人嘅梦想！」对今次访问风波绝口不提。