今届世界盃缺少多位着名球星，有人因为受伤，亦有人由於所属国家队未能晋身决赛周，但最可惜系部份猛将明明状态当勇，却黯然落选大军名单，不禁令质疑领队有眼无珠。

数到「含冤」落选今届世界盃球员名单，一定要提罗拔图法明奴，呢位利物浦前锋今季英超上阵13场入7及3次助攻，属於今季英超入波最多嘅巴西球员，偏偏巴西主帅迪迪却拣选另外4位效力英超球会嘅前锋加比尔捷西斯、加比尔马天尼利、李察利臣、安东尼马菲奥斯，都唔要法明奴。

尤其系热刺前锋李察利臣今季踢10场英超都食白果，早前仲受伤，都可以入选巴西队，令球迷更加替法明奴唔抵。

罗拔图法明奴唯一比其他巴西前锋输蚀，系已经31岁，可能迪迪为球队未来着想，所以弃用呢位老将。

另1位「含冤指数」非常高嘅落选球员，必定系曼联门将迪基亚，佢近2季表现神勇，多次拯救红魔鬼，但西班牙领队安历基却一直冷待呢位32岁钢门，宁愿拣白礼顿门将罗拔山齐士、宾福特门将大衞拉耶。虽然迪基亚过去踢国家队表现一般，但冇理由连26人名单都入到。

事实上，安历基拣人准则一向备受争议，除咗弃用迪基亚之外，亦将沙治奥拉莫斯拒於门外，遭到唔少球迷批评。虽然呢位中坚已经36岁，但今季摆脱伤患後，重拾水准，成为巴黎圣日耳门正选，老而弥坚，甚至更胜部份入选嘅西班牙後衞。

难怪西班牙球迷指有份入选嘅巴塞隆拿後衞艾利加西亚整体能力比唔上沙治奥拉莫斯一只脚。

另外，阿根廷主帅史卡朗尼弃用曼联新星加拿祖，亦令人感到可惜，呢位18岁翼锋近期状态大勇，11月初欧霸盃为曼联一箭定江山击败皇家苏斯达，英联盃主场对阿士东维拉，贡献2次助攻，上仗英超对富咸，更加补时入波，帮曼联赢2比1，前途无可限量。

既然今届世界盃各队名单增加3席至26人，加拿祖应该值得占1席，虽然未必可以踢正选，但起码畀呢位新星去感受大赛气氛，将来或者可以成为美斯接班人。

不过史卡朗尼却宁愿拣今季表现平庸嘅费伦天拿前锋尼高拉斯干沙利斯，都唔要加拿祖，实在令人费解。