葡萄牙球星C朗近期是非多多，数臭曼联专访出街後，震撼球坛，自己亦身陷危机之中，呢位37岁射手身体抱恙，葡萄牙主帅费兰度山度士透露，C朗因为肠胃炎，缺席国家队操练，并无法出战周五(18日)凌晨热身赛对尼日利亚。以C朗今季身体及精神状况，可能影响踢世界盃嘅发挥。

C朗近期身体出现毛病，对上一次参加比赛，已经系11月6日英超为曼联作客阿士东维拉，其後据报生病，缺阵红魔鬼近2场比赛。

呢位球星返回葡萄牙国家队报到後，虽然早前有参与操练，但当地时间周三(16日)又因为肠胃炎未能操练。葡萄牙领队费兰度山度士为安全起见，决定收起C朗，唔需要佢踢热身赛对尼日利亚。

由於今仗系葡萄牙出战世界盃前最後1场热身赛，C朗未能上阵，等於失去1次同队友磨合嘅重要机会，加上佢已经多日冇踢过正式赛事，状态成疑，能否出战11月25日凌晨葡萄牙首场世界盃分组赛对加纳，亦存在暗涌。

葡萄牙原本已失去因伤落选嘅利物浦射手迪亚高祖达，如果C朗都唔踢得，势必削弱球队锋线实力，令争出线增添难度。葡萄牙身处H组，同组对手有加纳、乌拉圭、南韩。