比利时早前热身赛1比2不敌埃及，夏萨特正选上阵踢咗71分钟，惹来大量球迷批评，除咗因为表现欠佳之外，亦由於佢身材发福，肚腩凸晒出嚟，完全唔似职业球员，呢位31岁球星承认自己无法重拾巅峰状态。

夏萨特3年前加盟皇马後，因伤抖多过踢，但仍然入选国家队参加今届世界盃，早已引起争议，加上身体愈来愈肥胖，令更多球迷睇唔过眼，寸佢身形似一个汉堡包。

「夏神」近日接受传媒访问时，承认无法重回巅峰水准：「坦白讲，我冇可能恢复2018年世界盃嘅水平，咁讲并非一件值得羞耻嘅事，我嘅身体及精神都遭受太多苦难。」

不过，夏萨特认为自己技术仍然出色，只系失去信心，希望日後经过调整，表现可以逐渐改善，以夏萨特现时状态，相信今届世界盃只能担任後备。