阿根廷将於今晚（22日）登场，世界盃D组大战沙地阿拉伯，有记者於赛前操练影到美斯右脚踝明显肿起，引起受伤疑云，不过美斯记者会上重申自己「状态良好」，相信佢亮相今场比赛。

美斯早前因阿基里斯腱发炎而要独自训练，周一（21日）佢终於回归阿根廷队团体操练，不过有记者就影到美斯右边足踝明显肿起，疑似有新伤势！不过美斯喺记者会上称：「我身体状态非常理想，身心都冇任何问题，场边训练只系因为安全起见。今届系我最後一届世盃，系最後一个圆梦机会。世盃唔同其他比赛，你永远唔会知下次仲有冇机会踢，所以我同年轻球员讲，一定要尽情享受。」

今届好大机会系7届金球奖得主美斯嘅最後一届世界盃，佢能否圆梦带领阿根廷捧走冠军成为焦点。赛前记者会结束後，记者们向美斯送上掌声，更有记者为其打气，高呼：「加油！」

美斯亦相当期待今届世盃来临，佢喺Instagram上写：「我一向为代表国家队感到自豪，明日我们将带着强烈的渴望出战另一届世界盃，我们会并肩作战！阿根廷加油。」