英格兰喺世盃分组赛首战6比2大炒伊朗，不过赛後就出现令人担心嘅画面，王牌前锋哈利卡尼喺比赛期间曾被踢伤右脚足踝，赛後佢被影到受伤位置进行包紮，而且离开球场嗰阵更加拐下拐下咁行，令人担心佢嘅伤患严重。

哈利卡尼今场虽然冇入波，但唔少攻势都系经佢发板，包括交出2次助攻畀史达宁同拉舒福特入波，但佢下半场被保拿利干治粗野踢伤，虽然佢之後继续比赛，但记者Ornstein赛後影到哈利卡尼右脚足踝要进行包紮，而且拐住咁走行得极唔自然，明显系仲觉得痛楚。

英格兰领队修夫基赛後就话：「我相信哈利卡尼冇乜事，嗰脚犯规睇落真系好肉酸，但哈利卡尼都可以继续比赛，尾段将佢换走，系因为个比数容许我做呢次换人。」至於疑似脑震荡离场嘅哈利马古尼，赛後透露自己带病在身，问题唔大，期待第2场分组赛再上阵。