巴西上仗世界盃击败塞尔维亚，但进攻主将尼马受伤，将缺阵周二(29日)凌晨第2场分组赛对瑞士，幸好「森巴兵团」仲有1位「尼马2.0」，就系洛迪高高斯。呢位皇马前锋早已获尼马钦点为巴西10号球衣接班人，今仗正系佢争取做主角嘅好机会。

现年21岁嘅洛迪高高斯同尼马都系出身於巴甲老牌球队山度士，登陆欧洲球坛第一站同样去西甲，因而有「新尼马」之称。

尼马2013年加盟巴塞隆拿，而洛迪高高斯3年前选择转投皇马，看似系「死对头」，但尼马仍然非常关照呢位师弟，根据洛迪高高斯透露，尼马曾经私下同佢讲，自己就快退出国家队，巴西未来10号球衣将会交畀佢。

尼马钦点洛迪高高斯做接班人，除咗出身同门因素之外，其实呢位新星近年表现的确非常出色，上季为皇马上阵49场入9球，包括上届欧联4强次回合对曼城，个人梅开二度，成为反胜最大功臣。

洛迪高高斯今季保持水准，为皇马上阵19场已入7球，相信好大机会可以超越自己上季入波数字，有呢位师弟帮手，尼马可以放心养伤。