周日（27日）晚世盃「死亡E组」次轮赛事，上仗逆转胜嘅日本，喺高温兼大轮换下表现失准，倒灶以0比1不敌哥斯达黎加，令出线出现暗涌。

日本首轮热血反胜德国，还原漫画《足球小将》神剧情，主帅森保一今仗作出大轮换，山根视来、守田英正、相马勇纪、上田绮世及堂安律，代替酒井宏树、久保建英、田中碧、伊东纯也及前田大然担正。可能因为打早场关系，喺摄氏32度高温下比赛，除咗开波初段日本一轮抢攻外，之後节奏偏慢，入肉埋门唔多，哥斯达黎加吸取上仗对西班牙惨吞7蛋嘅教训，明显更注重防守，半场互交白卷。

易边後日本换入浅野拓磨，呢位上仗後备入替攻入奠胜球嘅前锋上阵後，比赛节奏立即加快，守田英正劲射畀哥军门将基罗拿华斯救出，可惜浅野拓磨未能补中，相马勇纪主射罚球亦高出。日本之後再换入三笘薰及伊东纯也，加强攻力。

不过「蓝武士」喺81分钟一次犯错，吉田麻也於後场传波到喉唔到肺，畀基舒亚富拿截到远射，日本门将权田修一掂到都照入，呢球系哥斯达黎加今届首次中龙埋门即入波，打破僵局。日本末段倾巢反扑，浅野拓磨近射又过唔到基罗拿华斯，最终一球饮恨，依家日本同哥斯达黎加都有3分，大家都有出线机会，日本尾轮要硬撼最强嘅西班牙，非常恶踢。