今届世盃决赛周搞搞新意思，各路大军名单由以往23人增加至26位球员，但部分领队唔识珍惜，宁愿将位置留畀有伤嘅爱将，白白浪费一个位置。亦有主帅滥竽充数，填满26个球员名就算，搞到唔少国脚长坐後备席做观众。与此同时，有球员因伤、纪律及私事等问题，提早告别赛事，亦令球队嘥咗个位，依家就去捉出呢班世盃「大嘥鬼」。

宾施马开波前忽然受伤 迪甘斯硬颈唔换替补

衞冕嘅法国阵容粒粒皆星，当中宾施马上季协助皇家马德里赢得欧联冠军，理所当然入选法国大军。呢位金球奖得主喺开波前突然受伤，当时已知出战世盃机会唔大，但法国领队迪甘斯冇作补选，希望宾施马喺较後阶段奇迹康复。奇怪嘅系宾施马冇落场不特止，近日仲离队返皇马报到兼随队操练，摆明唔会为法国出战世盃，迪甘斯咁就嘥咗个宝贵名额。

後备实力难令人信服

虽然法国球星众多，但佢哋喺分组赛最後一轮面对突尼西亚时，作出大幅轮换下，一班後备兵同基利安麦巴比及基奥特呢批主力，实力明显有段距离，结果被突尼西亚控制战局，最终更以一球败北，可见法国後备兵难以令人信服。虽然佢哋前线仲有大把好球员，但如果迪甘斯当初肯搵人代替宾施马，相信球队调动会更得心应手。

宴客激晕阿女半场焗离队 安祖阿休连环玩谢加纳

加纳喺世盃最後一场分组赛生死战对乌拉圭，加纳上半场21分钟获得12码，本来系先开纪录嘅大好机会，但队长安祖阿休操刀居然宴客，转个头就被乌拉圭攻破大门，一来一回由出线在望，变成出局，认真嘥料。

不敌乌拉圭齐齐毕业

踢完上半场後，安祖阿休突然被换走唔见影，原来呢位32岁中场嘅7岁女，睇到老窦上半场宴客，一时接受唔到，情绪崩溃晕倒，要送院检查。安祖阿休半场休息时，立即由球场赶去医院了解情况，加纳领队艾度无奈被迫提早换人，打乱晒部署，最终球队以0比2不敌乌拉圭。由於另一边厢南韩爆冷赢到葡萄牙，令到加纳同乌拉圭齐齐小组毕业。

安祖阿休场上失机，半场更加因私事离开球场，打乱领队部署，虽则话家人为重情有可原，但对加纳嚟讲点都系双重打击。同时亦令人联想起2010年世盃8强，加纳名将基恩加时最後一刻射失12码，将晋级资格拱手让畀乌拉圭。

朗奴阿拿奥祖 变「短期游客」

查实乌拉圭近年不断有新星涌现，23岁嘅朗奴阿拿奥祖就系其中之一，呢位巴塞隆拿守将可出任中坚及右闸位，深得乌拉圭主帅迪亚高艾朗素欢心，不过佢喺9月热身赛对伊朗，开波冇耐即拉伤右脚大腿，被迫退下火线，虽然事後已经即时做手术，但呢类大腿内侧肌腱撕裂，坐底要抖两至三个月，理应缘尽世盃。

巴塞要求100％康复先可披甲

虽然如此，但迪亚高艾朗素并冇放弃阿拿奥祖，希望佢能够赶及喺世盃淘汰赛上阵。结果阿拿奥祖康复速度比预期快，成功获选入世盃大军。不过由於佢未完全好番，巴塞为保障球会利益，要求乌拉圭提交文件，证明阿拿奥祖百分百健康先可以披甲，如果唔系就会告上国际足协。乌拉圭为安全起见，最终3场分组赛都冇出到阿拿奥祖，搞到佢睇住球队小组出局，堪称「世盃游客」。

马里奥葛斯 灵气荡然无存

作为2014年世盃决赛一箭定江山嘅德国夺冠功臣，马里奥葛斯经历伤病及状态跌Watt，呢位昔日金童今季喺法兰克福重生，事隔5年再获「日耳曼兵团」重召，无论系佢定球迷都无限憧憬。虽然葛斯都预咗做後备力量，但由於迪姆华拿及马高列奥斯等因伤落选，令球迷觉得主帅费历克或者有机会用到佢。

陪同日耳曼兵团败走

不过事与愿违，费历克出名爱用拜仁帮，就算系士哥不断嘅云达不来梅箭头富克洛，上阵时间都偏少，更何况系30岁嘅葛斯呢。而且佢同球队格格不入，两次喺球队落後下後备落场，除咗驳脚之外可谓毫无建树，当年屡有神来之笔嘅灵气随住岁月消失，最终同国家队一样，黯然败走今届世盃，令人唏嘘。

丹尼路彭利拿 一场就打柴

喺8强倒灶不敌摩洛哥嘅葡萄牙，究竟C朗拿度有冇嘥到一个国家队位置，仍然系球迷茶余饭後热话，但中坚丹尼路彭利拿一定系其中一位「大嘥鬼」。呢位效力巴黎圣日耳门（PSG）嘅後衞，踢完首场分组赛对加纳之後，就因伤一直缺阵，其後更同左後衞兼PSG队友纽奴文迪斯一齐提早离队，返球会接受治疗。

39岁比比被迫临危受命

葡萄牙主帅费兰度山度士原本对丹尼路彭利拿寄望甚殷，但佢踢咗一场之後就打柴，惟有用番39岁老将比比扼守中路，虽然呢位「杀人王」老而弥坚，防守稳阵之余，更加喺16强对瑞士顶入一球靓波。不过比比年纪始终唔细，好难场场都有高水准演出，结果葡军8强真系出事，喺门将迪奥高哥斯达犯错下，畀摩洛哥嘅安尼斯利一头顶出局。费兰度山度士依家应该好後悔拣咗丹尼路彭利拿，而冇拣到效力里尔嘅22岁天才中坚堤亚高查迪路。

唔妥助教？ 宾韦特斋坐後走人

英格兰喺世盃前出现伤兵潮，两闸列斯占士及芝维尔同告受伤，领队修夫基最终选咗今季喺阿仙奴状态大勇嘅宾韦特，呢位25岁球星可踢右闸同中坚，理论上好使好用，不过英格兰首场分组赛对伊朗，宾韦特就因病缺阵，之後两场对美国及威尔斯都坐足全场，分组赛完结後更宣布因「私人原因」提早离队，卡塔尔之旅「到此一游」。

英军阿仙奴声明冇提原因

英格兰同阿仙奴嘅声明，只提到「我哋与你同在」，冇讲实际原因，起初外界怀疑系宾韦特家人健康出现问题，佢离队後亦冇立即跟随阿仙奴去杜拜集训。不过英国《每日星报》就爆料，话宾韦特离队嘅真正原因，系唔妥修夫基助手贺兰特，双方更发生过争执，修夫基为免影响军心，权衡轻重後宁愿畀佢离队冇咁嬲。无论消息系咪真，宾韦特继上年欧国盃有入选但冇落场後，再次喺国际大赛「斋坐」。

踢法唔夹领队 奥拿拿企硬被赶走

喀麦隆今届世盃G组以1胜1和1负成绩出局，表现令球迷失望，效力国际米兰嘅门将奥拿拿算系队中较有卡士球员，不过分组赛首轮0比1输畀瑞士後，喀麦隆突然发出声明，话奥拿拿因为纪律问题被逐出大军，之後两场分组赛改由二号门将伊柏斯把关。

26岁嘅奥拿拿喺巴塞隆拿青训出身，之後转会阿积士成名，佢嘅脚下功夫同传控技术都切合现代足球要求，亦令佢可以喺欧洲大球会企稳正选。讽刺嘅系，据报奥拿拿同领队尼高拔桑治争执，系因为後者要求佢改变上脚踢法，喺後场尽量「一脚清」，奥拿拿拒绝改变惨被踢走。其实尼高拔桑治一早知道奥拿拿嘅风格，如果唔啱自己心水，点解又要选佢入国家队呢？

生死战连环失机 卢卡古成头号「战犯」

今届最令人失望球队，比利时都可谓其中之一。呢支「欧洲红魔」连分组赛都突围唔到，令人大跌眼镜，当中箭头卢卡古喺最後一场对克罗地亚频频失机，亲手改变比利时嘅命运，难怪受外界猛烈批评。

累比利时小组出局

呢位29岁国际米兰前锋，今季一直受伤患困扰，各项赛事只系上阵5次，状态当然大不如前，首场分组赛亦无法赶及披甲。佢之後喺对摩洛哥时复出谂住救国，但勉强落场冇乜建树，而喺最後一场对克罗地亚嘅生死战，卢卡古後备入替，全场录得5次射门，当中4次属於「黄金机会」，入球值（xG）高达1.7，点知佢全部失诸交臂射失，可谓比利时出局嘅头号「战犯」，兼成为今届世盃目前为止失机次数最多嘅球星。就算佢完场後抱头痛哭，又向後备席挥拳泄愤，要由助教亨利安慰，但相信球迷都唔会原谅佢。

夏萨特肚腩现晒形 落场等同踢少个

比利时「黄金一代」标志性人物、「10号仔」兼队长夏萨特世盃後宣布退出国家队，结束14年国际赛生涯，其实以佢嘅状态同身体条件，已经唔再适合应付高水平赛事，难怪有球迷认为佢今届世盃都唔应该入选，令球队浪费咗个位。

承认上唔番最佳水平

夏萨特自从由车路士转投皇马後，状态急剧下跌，今季喺皇马沦为「透明人」，主帅安察洛堤都对佢抱放弃态度，对上一次西甲上阵要数到9月初对马略卡，之後9场西甲都系长坐後备席。

今届世盃比利时领队马天尼斯坚持选佢入队，夏萨特喺热身赛对埃及时，被影到成个肚腩现晒形，无论体形同状态都令人担心，当时佢都承认返唔到巅峰水平，不过马天尼斯坚持己见，头两场分组赛仲派佢正选上阵，搞到比利时等同踢少个，最终喺分组赛出局，依家睇番一啲都唔意外。

艾利加西亚坚炸弹 安历基都唔敢用

西班牙主帅安历基一向偏心「巴塞系」球员，但今届世盃有一人例外，佢就系21岁中坚艾利加西亚。呢位後防「炸弹」喺国家队表现属灾难级，虽然安历基都有选佢入世盃大军，但今届赛事1分钟都唔敢派佢落场，未踢过就直接返归，坚系嘥咗个位。

踢国家队经常犯错

艾利加西亚效力曼城期间一度被誉为天才新星，获哥迪奥拿大力栽培，但佢之後回归西甲加盟巴塞，表现载浮载沉，踢国家队时更加唔合格，包括去年世盃外对瑞典，以及今年6月欧国联对捷克，「斗牛兵团」都因为艾利加西亚犯错而失利，当时安历基仲「死揽」佢：「以佢嘅年纪同经验，其实已经做得好好。」

不过安历基得把口，身体最是诚实，今届完全唔敢派加西亚落场，摆明都知佢乜料。西班牙喺世盃黯然出局後，安历基亦正式落台，睇怕下任主帅都唔会再选加西亚入队，以免浪费一个席位。