巴西喺今届世界盃被克罗地亚淘汰之後，近5届有4届8强止步，「森巴足球」出现没落危机，巴西足总计划进行大改革，重点聘请欧洲主帅执教，盛传已联络皇马教练安察洛堤，「肥安」亦持开放态度，双方有望一拍即合。

巴西领队迪迪喺世界盃举行前已经表明无意留任，所以巴西足总10月开始物色新帅，包括斟介安察洛堤同哥迪奥拿。足球理念上，哥帅嘅传控战术无疑比较适合巴西，但呢位西班牙名帅已拒绝邀请，并同曼城续约。

至於意大利名帅安察洛堤持开放态度，但前提系要带领皇马踢完今季赛事再倾。「肥安」上季率领皇马夺得西甲及欧联冠军，教波功力唔需要怀疑，同埋皇马阵中拥有3位巴西国脚艾达米列达奥、云尼斯奥斯祖利亚、洛迪高高斯，加上卡斯米路之前都跟过佢搵食，安察洛堤对巴西队球员有一定了解，都算系一合适新帅人选。

不过，安察洛堤同皇马嘅合约要等到2024年夏天先至届满，即使佢同意接掌「森巴兵团」帅印，巴西足总亦可能要破费帮佢买断余下合约年期，同埋「肥安」最快都要明年6月先至可以上任，巴西需要搵1位临时主帅负责未来半年工作。