世盃40年超强定律克罗地亚最有福气！

2022-12-13　来源: 八一体育点击

世盃4强大战即将上演，阿根廷、克罗地亚、法国同摩洛哥争逐决赛席位，边队可以晋级难以预料。如果信邪嘅话，世盃原来有个已出现40年嘅超强定律，就系决赛一定会有嚟自拜仁慕尼黑同埋国际米兰嘅球员上阵，今届4强亦充斥呢2支欧洲豪门嘅战将，其中克罗地亚有齐两间球会成员，睇落最有「福气」。

唔讲你唔知，近10届决赛都一定「同时」有拜仁同国米嘅球员上阵，自1982年意大利对西德开始，当时意大利有贝高美、阿杜布尼嘅「国米帮」，最终击败路明尼加嘅「拜仁帮」捧盃。4年後西德再入决赛，路明尼加已由拜仁转会国米，而拜仁就有马图斯、迪打汉尼斯等做代表。

90年西德赢阿根廷捧盃，拜仁提供高拿、路达同欧真泰拿3大守将，「铁三角」马图斯、奇连士文同布林美就效力国米；94年决赛巴西对意大利，意大利有国米中场柏堤，巴西就有拜仁右闸佐真奴。98年系首次冇德国或者意大利踢决赛，但一样无阻定律出现，朗拿度、佐卡夫同李沙拉素都效力2大班霸，4年後朗拿度继续担起「国米大旗」，成功击败德国以简尼为首嘅拜仁力量。

06年世盃决赛，国际米兰中坚马特拉斯成为意大利捧盃英雄，佢入波追和法国之余，仲撩到施丹用「爱心头槌」食红牌，最後互射12码佢亦有份射入，法国右闸沙洛当时效力拜仁。2010年决赛荷兰输畀西班牙，洛宾、云邦美同史奈达分别效力拜仁同国米。

2014年德国勇夺冠军，对阿根廷嘅决赛一共有7名拜仁球员上阵，阿根廷嘅3名国米球员就坐喺後备，正当以为走势将会断缆，阿根廷最後12分钟换入柏拉斯奥保住呢个「传统」。上届世盃克罗地亚有波索域同比列锡2位国米球员，法国又系到最後17分钟先换入拜仁嘅哥伦天杜利素。

今届世盃4强合共有7个拜仁、国米球员，法国有乌柏美卡奴等4位拜仁球星、阿根廷就有国米前锋拿达路马天尼斯、摩洛哥亦有拜仁後衞马沙拉奥，克罗地亚更有齐国米波索域同拜仁嘅祖薛史坦尼锡。

1982年●意大利 VS 西德

国际米兰：贝高美(意)、阿杜布尼(意)、奥利亚尼(意)

拜仁慕尼黑：路明尼加(德)、达美拿(德)、毕列拿(德)

1986年●阿根廷 VS 西德

国际米兰：路明尼加(德)

拜仁慕尼黑：马图斯(德)、迪打汉尼斯(德)、伊达(德)

1990年●西德 VS 阿根廷

国际米兰：马图斯(德)、奇连士文(德)、布林美(德)

拜仁慕尼黑：欧真泰拿(德)、高拿(德)、路达(德)