今届世盃曲终人散，当中创造咗唔少经典场面，多位原本寂寂无闻嘅球员突破冒起，更有惊喜演出，表现令人刮目相看。经此一役之後，佢哋人气及身价水涨船高，势必成为各大球会争相招揽目标。

●利华高域 新一代扑救12码专家

克罗地亚今届世盃两度藉互射12码过关，门神利华高域居功至伟，佢喺呢2次极刑大战，共救出4个12码，其中16强对日本之役，先後扑出南野拓实、三笘薰同吉田麻也嘅极刑，成为世盃史上第3位喺单场互射12码救出3球嘅门神，被称为「克罗地亚哥高查」，赞扬佢嘅表现可媲美呢位前阿根廷救12码专家。利华高域喺8强对巴西扑出洛迪高高斯极刑外，法定时间连加时更作出11次成功扑救，令呢位1米87嘅萨格勒布戴拿模门神声价十倍。

国籍：克罗地亚

年龄：27

位置：门将

效力球会：萨格勒布戴拿模

●耶辛尼保奴 摩洛哥神龙有望登豪门

正所谓弱旅出钢门，摩洛哥门将耶辛尼保奴系最佳例子。佢除咗喺分组赛对比利时之役，离奇地开波前受伤缺阵外，其余6仗场场打足，尤其系头4仗只系失咗1粒，仲要系自己友摆乌龙，16强互射12码扑出2球而淘汰西班牙，8强赢葡萄牙1比0又作出3次关键扑救，令摩洛哥成为史上首支杀入世盃4强嘅非洲球队，证明耶辛尼保奴实力可登大雅之堂，有传拜仁慕尼黑对佢有兴趣，睇嚟西维尔好难留住佢。

国籍：摩洛哥

年龄：31

位置：门将

效力球会：西维尔

●苏夫恩岩拉伯特 破尘封抢夺球权纪录

摩洛哥今届神奇杀入4强，超强防守能力系主要原因，呢支非洲雄师由分组赛去到8强，5场比赛只系失过1球乌龙波。7场比赛踢足660分钟嘅防守中场苏夫恩岩拉伯特，堪称系今届表现最佳球员之一，今届57次成功抢夺球权，系1966年有纪录以来世盃抢夺球权最多嘅非洲球员。效力意甲费伦天拿嘅苏夫恩岩拉伯特，球会生涯未有任何重要成就，不过今届世盃锋芒毕露，据报法国总统马克龙喺准决赛後，当面赞佢系今届世盃最佳中场，有传利物浦等豪门都有意将佢收归旗下。

国籍：摩洛哥

年龄：26岁

位置：中场

效力球会：费伦天拿

●干卡路拉莫斯 一战成名担起葡军大旗

今届世盃最多人谈论嘅事件，相信葡萄牙喺16强收起「球王」C朗拿度系其中之一，而21岁前锋干卡路拉莫斯就喺呢个火热时刻成功上位！代替C朗担任葡萄牙正选前锋，对任何球员都系无比压力，何况系事前从未为葡萄牙踢正选嘅新人？结果干卡路拉莫斯唔单止顶住压力，更连中三元带领葡萄牙晋级，即刻成为国家英雄！效力葡超宾菲加嘅干卡路拉莫斯，潜力早已获得肯定，传闻曼联世盃前已经想将佢收购，虽然葡萄牙之後喺8强止步，但干卡路拉莫斯已展示出佢担大旗嘅能力，葡萄牙嘅「後C朗时代」，干卡路拉莫斯将扮演重要角色。

国籍：葡萄牙

年龄：21岁

位置：前锋

效力球会：宾菲加

●高路梅安尼 边缘人变後备杀手

高路梅安尼原本冇份入选法国出战今届世盃嘅名单，但由於尼干古因伤退队，先至获得补选，呢位前锋成为法国最後2场比赛「秘密武器」，包括4强对摩洛哥，後备上阵44秒入波，为球队锁定2比0胜局，兼创下世盃史上第3快嘅後备上阵入波纪录。去到决赛，高路梅安尼再次扮演奇兵，後备上阵多次为阿根廷防线构成威胁，并博到12码，成为赛事转捩点，造就法国迅速连入2球扳平，否则已经喺法定时间输波，表现令人刮目相看。高路梅安尼加时有1球劲射几乎绝杀对手，互射12码阶段有份主射入网，可见佢即使大赛经验不足，但胜在心理质素佳，顶得住大赛压力，相信经过今届世盃後，高路梅安尼可奠定国家队常规席位，唔使再做边缘人。

国籍：法国

年龄：24

位置：前锋

效力球会：法兰克福

●三笘薰 「1.88毫米」助攻震惊全球

日本系今届世盃嘅惊喜球队，反胜德国同西班牙两支前度世界冠军震撼全球，效力英超白礼顿嘅翼锋三笘薰虽然唔系正选，但佢4场比赛担任「後备杀手」角色，落场後都有出众表现。首仗对德国佢喺57分钟上阵，即以强大冲击力搞到德国防线立立乱，最终日本连入两球反胜。分组赛最後一轮生死战，日本半场落後下换入三笘薰，佢即刻炮制今届经典嘅「1.88毫米」白界助攻，协助日本反败为胜。美中不足嘅系，日本喺16强互射12码不敌克罗地亚，三笘薰亦系宴客罪人之一，但佢嘅表现绝对系日本今届亮点之一。

国籍：日本

年龄：25岁

位置：翼锋

效力球会：白礼顿

●堂安律 奇迹之男抵佢招积

虽然日本今届世盃未能突破16强呢道「叹息之墙」，但喺分组赛接连反胜前世盃盟主德国同西班牙，两仗都有波入嘅堂安律被封为「奇迹之男」。呢位曾刷新亚冠及日职最年轻出场纪录嘅球员，近年先後於荷兰及德国搵食，唔似其他日本球员咁无私，佢更加系「利己主义」，自己非常积极争取入波，而且自信爆棚，喺对西班牙赛前曾豪言，唔会输畀同一对手两次，果然讲得出做得到，攻入1粒成为反胜英雄，令嘲笑佢嘅人全部收声。

国籍：日本

年龄：24

位置：中场

效力球会：弗赖堡

●添莫菲韦亚 小韦亚建功叻过老窦

美国喺今届世盃以年轻球员担大旗，最後成功突破分组赛杀入16强，表现令球迷感到满意，唔少新人都大获好评，其中前锋添莫菲韦亚最受注目。呢位22岁前锋来头极猛，佢爸爸系前世界足球先生韦亚，亦即系现任利比里亚总统，代表美国嘅添莫菲韦亚唔单止能够参加爸爸从未踢过嘅世盃决赛周，更喺首仗对威尔斯射入1球，足以令老韦亚感到无上光荣。添莫菲韦亚遗传爸爸嘅球技同射术，喺巴黎圣日耳门出道後备受好评，近年喺里尔更加逐步抢占主力位置，作为美国国家队新生代代表，相信佢喺国际舞台会有更大成就。

国籍：美国

年龄：22岁

位置：前锋

效力球会：里尔

●艾达沙尼 沙特翼锋天堂跌地狱

沙特阿拉伯喺世盃首轮分组赛爆冷击败阿根廷，艾达沙尼射入1球世界波，协助球队反胜，技惊四座，一度令呢支西亚球队出线机会大增。点知第2场对波兰，艾达沙尼却射失12码，成为输波罪人，认真大起大落。最戏剧性系最後1轮分组赛，艾达沙尼补时5分钟建功，令墨西哥即使赢波，都因为得失球差唔及同分嘅波兰，黯然出局。艾达沙尼2个入球及1次12码宴客，完全左右该组出线形势，实在抢镜。呢位翼锋有突出表现，并非偶然，因为佢曾经「浸过咸水」，效力过西甲球队维拉利尔，功架十足，绝非池中物。

●安拿华伦西亚 厄瓜多尔入球机器

厄瓜多尔喺世盃分组赛出局，不过射手安拿华伦西亚就令人留下深刻印象，呢位曾经踢过英超韦斯咸同爱华顿嘅前锋，球会生涯从来都唔系星级球员，但喺国家队就成为「国宝级」前锋，而且喺世盃舞台更加有出众表现，称得上系「大赛球员」。33岁嘅安拿华伦西亚喺揭幕战梅开二度，第2轮分组赛对荷兰亦有入球，连同8年前嘅巴西世盃，当届厄瓜多尔分组赛3个入球全部由佢包办，令安拿华伦西亚跨届为国家队喺世盃连入6球，同尤西比奥、罗斯、沙兰高3位名将睇齐，就算厄瓜多尔仍然逃唔过分组赛出局命运，呢3个入球亦足以令佢名留青史。

国籍：厄瓜多尔

年龄：33岁

位置：前锋

效力球会：费伦巴治

●阿布巴卡 射破巴西最威呢铺

「非洲雄狮」喀麦隆虽然分组赛出局，但都掩盖唔住阿布巴卡嘅锋芒，呢位前锋对塞尔维亚一役，後备上阵立即贡献1入波及1次助攻，帮球队逼和对手3比3。最犀利系对巴西，阿布巴卡喺补时入波，助喀麦隆爆冷赢1比0，亦系今届赛事唯一能够喺法定时间击败「森巴兵团」嘅球队。阿布巴卡入波之後，即使球队已笃定出局，但仍然除衫庆祝，攞第2张黄牌，两黄变一红被赶出场，成为自2006年施丹之後，另1位单场世盃有入波及攞红牌嘅球员，离场时仲获球证祝贺赢波，实在罕见，成为经典一幕。

国籍：喀麦隆

年龄：30

位置：前锋

效力球会：艾纳斯

●米斯拿夫柯锡 格仔军神兵弹起

米斯拿夫柯锡其实喺今届世盃，只系克罗地亚後备前锋，但佢喺有限嘅出场时间交足货，最关键梗系8强对巴西，踢到加时落後1球情况下，佢喺末段妙传般奴柏高域入波扳平1比1，先至有机会凭互射12码晋级，去到季军战对摩洛哥更射入2比1嘅致胜靓波，今届赛事入1球及2次助攻，呢位中超弃将表现令人喜出望外。查实「格仔兵团」自文迪苏杰喺上届世盃退出国家队後，一直冇一名可靠中锋担大旗，柯锡随时变正印。

国籍：克罗地亚

年龄：29

位置：前锋

效力球会：萨格勒布戴拿模

●韦格贺斯 荷兰巨人辣着球王

荷兰喺世盃8强对阿根廷，一度落後2球，韦格贺斯後备上阵5分钟就入波，更加喺补时11分钟又建功，成为OPTA自1966年有统计以来，世盃法定时间最迟入波，协助荷兰戏剧性逼和2比2，佢喺互射12码阶段亦有主射入网，可惜球队最终都系出局。呢位身高1米97嘅「巨人」今届4次披甲都系比赛末段後备上阵，仍然可以把握机会一战成名，实在系球坛奇葩。值得一提，韦格贺斯唔止识入波，仲擅长挑衅对手，该仗比赛之後，美斯接受访问时，都忍唔住破口大骂韦格贺斯，令佢更加「声名大噪」。

国籍：荷兰

年龄：30

位置：前锋

效力球会：比锡达斯