阿根廷赢得世盃冠军後举国欢腾，胜利巡游有多达400万人参加，个个球员都变晒做国家英雄，不过阿根廷传媒报道，阿根廷球员竟然拒绝总统费尔南德斯嘅会面邀请，因为唔想沦为政治筹码，畀政府「叨光」。

阿根廷返国後举行连串庆祝活动，据报总统费尔南德斯曾邀请美斯等球员见面，喺总统府露台合照同球迷见面，但有消息人士透露，阿根廷球员认为世盃冠军属於所有人民，唔想变为现届政府嘅政治筹码，所以已经拒绝邀请。报道指美斯喺新冠疫情早期，曾经买咗批医疗仪器畀医院，但就被海关扣查一段长时间，令美斯对部份政府部门有所不满。

阿根廷对上一次喺1986年赢得世盃冠军後，马纳当拿同一众国脚都有去总统府同总统见面，但费尔南德斯就冇呢个机会。费尔南德斯喺决赛期间收睇电视直播，囝囝更着起阿根廷嘅波衫，以示对国家队嘅支持。