日本喺今届世盃表现出色，多得一班外流欧洲嘅年轻球员带动，近日再有日本球员进军欧洲，18岁嘅高中生福田师王，日前喺记者会正式宣布加盟慕逊加柏，预料会先喺U23比赛，不过预期适应新环境後，好快可以喺一队披甲上阵。

司职前锋嘅福田师王喺日本高中联赛嘅星级球员，亦系日本U17同U19代表，佢未毕业已经收到嚟自日本同海外球会十几份合约，今年初曾经去过拜仁慕尼黑同慕逊加柏试脚，最终被慕逊加柏收归旗上。

福田师王被日本传媒称为「怪物」，据报佢加盟慕逊加柏前，系得到前辈板仓滉同吉田麻也鼓励。报道指福田师王会喺1月中去慕逊加柏报到，去德国前会先为所属嘅神村学园踢埋月底展开嘅全国赛。