●结束球王争议美斯夺世盃登基

2022年系足球坛历史性一年，球迷见证「一代球王」喺世盃舞台登基。随住美斯带领阿根廷重夺失落36年嘅世盃冠军，多年来佢同Ｃ朗所有「球王争议」亦告一段落。继比利同马纳当拿後，「球王」两字正式成为美斯嘅专属代名词。

率领阿根廷36年後再捧盃

今年年尾，35岁嘅美斯第5度出战世盃，亦系佢实现世盃冠军梦嘅最後机会。阿根廷喺分组赛首仗虽然输畀沙特阿拉伯，令全球吓亲，但之後愈战愈勇杀入决赛，再凭互射12码击败衞冕嘅法国，捧走大力神盃，美斯亦同1986年带领阿根廷捧盃嘅马纳当拿睇齐。

美斯喺世盃破尽纪录，由16强到决赛场场入波，亦系世盃史上首位每场淘汰赛都有入球球员。过去十几年佢同C朗拿度边个先系球王，一直充满争议，如今答案显而易见。

●极速滑落C朗变过街老鼠

当美斯喺职业生涯尾声登上顶峰，佢嘅多年死敌C朗拿度极速由神坛滑落，无论系球会定国家队，都由昔日嘅「天之骄子」变为「过街老鼠」，令人唏嘘。

同曼联反面沦失业大军

C朗上年童话式回归曼联，但兰历克接手後，C朗踢法开始受质疑，今季荷兰主帅坦哈格上任後，更将佢视作整顿纪律嘅目标。C朗权威受到挑战明显唔顺气，季前要求转会被拒後唔肯归队，对热刺嘅联赛因不满做後备提早离场，世盃前专访「数臭」曼联，更加令佢同球会及全球曼迷为敌，结果11月同「红魔」提前解约，到呢一刻都未有班落。

球会生涯唔如意，C朗年尾为葡萄牙最後一次出战世盃谂住尽地一煲，首战亦有入球，估唔到「噩梦」随即而来，16强再度沦为後备，佢完场後独自返更衣室被插爆。葡萄牙8强被摩洛哥淘汰，後备上阵嘅C朗完场後喺球员通道痛哭，征战世盃留下最悲痛结局。

●麦巴比有权有势等坐世一位

世盃後度过24岁生日嘅法国射手基利安麦巴比，今年再次奠定「新世代球王」地位，年纪轻轻已经喺球坛「呼风唤雨」，世盃决赛连中三元更属足球史上经典，两届世盃有一冠一亚，绝对唔失礼。

转会闹剧续约PSG

麦巴比今夏原本被指「过硬」皇家马德里，但最後关头突然宣布续约巴黎圣日耳门（PSG），据报3年合约总值高达6.3亿欧元，系体育史上最丰厚嘅运动员合约，而且盛传佢可以干预球队组军等事务，绝对有权有势。

虽然麦巴比嘅「霸道」未必人人受落，但佢嘅表现足以叫质疑者收声，喺世盃决赛连中三元，凭8个入球勇夺世盃金靴奖，亦以24岁之龄追平比利喺世盃嘅入球数，新世代球王当之无愧。

●大丰收破垄断宾施马擸金球奖

随住美斯同C朗近年锋芒减退，双雄垄断个人奖项嘅时代亦结束。35岁嘅宾施马今年大爆发，横扫欧联、西甲同「金球奖」，虽然佢因伤无缘出战世盃决赛周，但2022年仍然系佢丰收一年。

为皇马赢晒西甲欧联

作为皇马头号射手，宾施马上季56场比赛狂入50球，带领皇马成为欧联同西甲双料冠军，亦令佢首夺「金球奖」，自哥柏、柏天尼、柏宾同施丹後，成为第5个得奖嘅法国球星。

宾施马原本被视为法国出战世盃嘅领军人物，可惜决赛周前受伤，世盃後佢亦心灰意冷，宣布退出国家队，专心帮皇马打江山。

●意甲变天A米封王破锦标荒

意甲米兰双雄再起风云，继国际米兰上年联赛封王後，今年到A米发威，斗到最後一轮力压国米，相隔11年重夺意甲冠军，并结束6年锦标荒。翼锋拉菲尔利亚奥当选上季意甲最佳球员，基奥特亦愈老愈可爱，成为法国打入世盃决赛嘅功臣之一。

下半年到拿玻里崛起

意甲嚟到下半年又变天，拿玻里强势崛起，今季15场联赛13胜2和，已经抛离次席位A米8分。呢支南部劲旅亦喺欧联分组赛力压利物浦首名出线，成为意国球坛今年最大惊喜。

●盃赛王文尼世盃缺席留憾

2022年对沙迪奥文尼可谓难忘嘅一年，呢位30岁前锋协助塞内加尔击败穆罕默德沙拿领军嘅埃及，夺得非洲国家盃冠军，其後两人又喺世盃外附加赛交手，结果都系文尼胜出，令沙拿无缘决赛周。但世事无常，文尼喺决赛周前受伤无缘呢项盛事，两大非洲神锋同时缺席，成为今届世盃一大遗憾。

为红军夺双冠後投拜仁

不过文尼今年仍然捧盃捧到手软，除年初带领塞内加尔赢得非国盃外，亦帮利物浦赢得英足盃及英联盃，成为3料盃赛先生。上季完结後佢今夏结束6年「红军」生涯，转投德甲班霸拜仁慕尼黑，成为今年其中一单瞩目转会。

●拜仁德甲10连霸冠绝欧洲

今年德甲仍然由拜仁慕尼黑独大，连续第10季称霸联赛，超越意甲嘅祖云达斯，成为欧洲5大联赛首支10连冠球队，中场汤马士梅拿及门将纽亚更加系「十朝功臣」。

留唔住罗拔佬不欢而散

不过拜仁今年唔系顺风顺水，效力咗8年嘅射手罗拔利云度夫斯基，夏天决意转投巴塞隆拿，不惜以罢操要求拜仁放人，最终不欢而散。「罗拔佬」离队後，拜仁今季季初成绩一度受影响，但球队根基深厚，三扒两拨就坐番德甲榜首位。

●受俄乌战争拖累阿布忍痛卖「车」

受到年头俄罗斯入侵乌克兰事件影响，俄罗斯不但遭欧洲足协及国际足协制裁，唔可以踢世盃附加赛、欧国联、欧国外及球会级欧洲赛，连带车路士班主阿布拉莫域亦受牵连。

保利入主清洗班底

呢位俄罗斯富商为免波及车仔，惟有忍痛卖盘，最终喺5月尾以总值42.5亿镑，卖畀以美国富商保利为首的财团，结束长达近廿载嘅「车主」生涯。保利入主後亦作出大清洗，高层施治、玛丽娜及主帅杜曹先後离开，真系一朝天子一朝臣。

●印尼甲组联赛人踩人酿174死

印尼东爪哇今年10月一场甲组足球联赛，因球迷骚乱引发人踩人，遇难人数达174人，包括超过30名3至4岁嘅儿童，成为足球史上其中一宗伤亡最惨重嘅球场惨剧。

当日系阿雷马队主场对帕尔斯巴亚队，客队以3比2胜出，赛後约3,000名主队球迷闯入球场，引发骚乱。大批防暴警持盾牌及警棍镇压，最後因施放催泪弹驱散人群，数百人跑往出口位置，混乱期间发生人踩人，导致惨剧发生。

●孙兴民获英超金靴亚洲首人

孙兴民上季喺热刺脚风顺到冇朋友，凭住煞科战斗诺域治省两粒，以23球拍住利物浦王牌穆罕默德沙拿，齐齐获得英超金靴，亦成为欧洲5大联赛史上，首个来自亚洲嘅神射手，更难得系佢呢23球中冇一个系12码，「亚洲1哥」实至名归。虽然「孙仔」随後喺世盃表现麻麻，但仍当选2022年南韩足球先生，亦系佢第7度获呢个殊荣。

●超级经理人拉奥拿因病离世

超级经理人拉奥拿4月底病逝，终年54岁。今年1月拉奥拿喺意大利入院作身体检查後，连随被送入深切治疗部，报道指佢有肺部疾病，当时已传出死讯，虽然拉奥拿之後作澄清，但最终都系敌不过病魔。拉奥拿能操多国语言，靠出色转会运作，赚取巨额佣金及签字费成名，虽曾被球迷谑为「吸血鬼」，但佢同多位球星关系密切，包括保罗普巴、艾宁夏兰特、伊巴谦莫域、卢卡古同巴洛迪利等。福布斯估计佢嘅身家高达6,200万镑。

●病情急转直下比利情况不妙

82岁嘅巴西球王比利因为癌症恶化，令到心脏及肾脏功能失调，今年11月尾世盃期间，被紧急送往圣保罗一间医院接受治疗，近日更有传比利家人已同巴西政府商讨筹备身後事。

比利旧年发现有结肠癌，需要经常进出医院进行化疗，自今年初开始，不停传出佢病危嘅消息。虽然比利喺送院後曾於IG报平安，但佢个女喺圣诞前夕表示，全家要喺医院过圣诞，更有指呢位曾协助巴西3夺世盃嘅足球传奇，已经无法说话。

●夏兰特登陆曼城横行英超

曼城近年一直踢开无锋阵，欠缺一位禁区杀手数胡，主帅哥迪奥拿今年终於谂通，今夏从多蒙特签入挪威神锋兼球队名宿之子艾宁夏萨特。

势破大堆入波纪录

「魔人」登陆英超後横行无忌，今季各项赛事都有士哥之余，截稿前为曼城上阵19仗狂入24粒，单计联赛13仗狂轰18球，效率奇高屈晒机。夏兰特劲在无论对住利物浦、曼联呢啲劲旅，抑或狼队、富咸及修咸顿呢啲中下游分子，统统大小通吃搵到入波，令一众铁衞闻风丧胆。