艾美利今季重返英超，佢接手阿士东维拉後，球队成绩回稳，近日有传维拉将於1月转会窗增兵，睇中贝迪斯29岁左闸阿历斯摩兰奴，转会费为1400万欧元。

转会专家Fabrizio Romano报道，艾美利喺西甲执教时已经留意阿历斯摩兰奴，过档维拉後认为呢位西班牙翼衞啱用，於是展开斟介，目前维拉同贝迪斯已交换转会文件，转会过程顺利，相信过埋体检就可以完成转会，喺英超亮相。

阿历斯摩兰奴喺西甲及西乙打滚多年，近年效力贝迪斯有稳定上阵机会，属助攻能手，今季为贝迪斯上阵19场送出3个助攻，佢喺德国《转会市场》身价为2000万欧元，艾美利能够以1400万欧元签佢，皆因佢熟悉西甲门路，帮维拉悭唔少。