国际米兰勇夺意超盃冠军！周四(19日)凌晨喺沙特阿拉伯上演嘅意超盃，国际米兰3比0大破AC米兰，史上第7次捧走呢个赛事冠军，阿根廷前锋拿达路马天尼斯又有入波，摆脱世盃期间被封嘅「败家仔」之名。

国米球员状态极佳，一开波就压制住AC米兰，10分钟靠一次精彩组织由费达历高迪马高左路轰入，国米21分钟再下一城，被迪斯高喺左路窄角度射入。国米下半场踢得较稳阵，但仍然喺77分钟再拎入球，拿达路马天尼斯乖巧入楔用脚背弹入，带领国米赢3比0捧盃。

阿根廷前锋拿达路马天尼斯喺卡塔尔世盃屡误戎机，被球迷批评系「败家仔」，但佢喺世盃後回复勇态，连埋今场已经连续4仗有波入。国米教练施蒙尼恩沙基赛後表示：「我哋踢出完美比赛，继欧联晋级後，我哋今季实现第2个目标，为下半季冲刺提供最好嘅基石。」