葡萄牙巨星C朗转战沙特阿拉伯球坛之後首战，就要同宿敌美斯交锋，将於周五(20日)凌晨率领利雅得明星队迎战巴黎圣日耳门(PSG)。由於37岁嘅C朗自上月10号世界盃8强之後，一直未有参加正式比赛，状态成疑。据悉佢同所属球会艾纳斯教练鲁迪加西亚商量之後，决定今场只会踢45分钟。

C朗上月底已落实加盟沙特豪门艾纳斯，但由於佢上季因打烂爱华顿小球迷电话，被英足总判罚停赛2场，即使去到沙特仍然要「坐波监」，加上艾纳斯因为外援名额爆满，亦令C朗延迟注册。

扰攘一大轮之後，C朗终於迎来转战中东第一击，率领由两支沙特劲旅艾纳斯及希拉尔球员组成嘅利雅得明星队迎战PSG。当各界期待两大球王C朗同美斯大斗法时，外媒爆料指C朗太耐冇比赛，状态不足，所以只会踢45分钟，球迷可能会失望。

考虑到C朗将会担任利雅得明星队队长，预料佢会以正选身份上阵，踢完上半场之後就休息，准备迎接下周一(23日)凌晨沙特联赛为艾纳斯披甲对伊蒂法克。

至於巴黎圣日耳门亦强阵出击，包括有「MNM」锋线美斯、尼马、基利安麦巴比，但中场主力马高华拉堤因伤缺阵，另一位中场沙拉比亚已落实转投英超狼队，签约2年半，无缘参赛。