曼城前锋艾宁夏兰特今季登陆英超後疯狂入波，人气急升，着名时尚杂志《GQ》都搵佢做专访，影咗一批型仔相，成为封面人物。呢位22岁挪威国脚分享成功秘诀，原来佢会以冥想减压，提升比赛表现。

艾宁夏兰特上得时尚杂志封面，当然要悉心打扮，包括身穿价值2,000镑外套、690镑冷衫。最抢眼系一改发型，由比赛时束起头发，变成一头长发示人，但呢个造形毁誉参半，有人称赞夏兰特型仔似摇滚歌手，亦有香港网民寸佢似港产电影《赌神3之少年赌神》反派角色高傲。

除咗衣着打扮之外，夏兰特大谈成功之道：「冥想对我有好大帮助，令脑筋冷静落来，唔去谂嘢，可以减少压力，我讨厌受到压力，会用一切方法避免受压，冥想就系一个好方法。」

另外，艾宁夏兰特仲话前曼联主帅苏斯克查系佢启蒙老师：「当你唔识处理比赛情况时，苏斯克查总可以提供解决方法，我同佢喺挪超球队莫迪共事2年，对我有好大影响，我今时今日可以入咁多波，都系多得佢教导。」

艾宁夏兰特近期罕有陷入球荒，近3次为曼城上阵都食白果，会唔会再次请教一下恩师苏斯克查呢？