巴塞隆拿同马德里体育会达成协议，荷兰世盃前锋迪比由巴塞转投马体会，转会费据报只须300万欧元，迪比已抵达马体会大本营，最快可於下仗西甲为马体会主场对华拉度列上阵。

迪比系巴塞朗奴高文执教时间签入嘅前锋，但佢加盟不久朗奴高文就被炒，而佢留喺巴塞亦冇运行，今季签入罗拔利云度夫斯基後，迪比几乎冇踢过，仅上阵4场入1球，反而喺卡塔尔世盃落场机会更多，仲喺16强对美国入波。

马体会高价外借祖奥菲历斯到车路士，收咗一大笔，然後佢哋就睇中迪比，近年巴塞同马体会之间有唔少超笋交易，包括苏亚雷斯同基沙文，马体会提出签入迪比，自然一切顺利，而且转会费只须300万欧元就可以得到该28岁世盃主力射手，可谓超值。

报道指，迪比已抵达马体会，并会立即参加大队训练，同施蒙尼及队友交流，如果状态理想，下仗西甲对华拉度列就会披甲上阵，继续佢嘅西甲生涯。