C朗拿度今个月以天价签约中东豪门艾纳斯，周一(23日)凌晨上演沙特阿拉伯联赛「地标战」，虽然上场表演赛踢得唔错，不过今仗主场对伊蒂法克表现麻麻，全场4次射门只得1次中龙，就连赛前热身都走错去对面场区，要队友叫番佢返嚟，明显仍未适应新环境。

艾纳斯上场同巴黎圣日耳门踢表演赛，C朗有2个入波，今场正式比赛首演备受注目，大批球迷拎晒横额入场打气，不过呢位37岁老将状态一般，头2脚掂波都造成甩波，无论系招牌罚球定系扣大位射门都未能命中，下半场一次禁区内扭波窄位射门，系佢唯一命中目标攻门，不过艾纳斯最终仍凭巴西前锋塔利斯卡入波赢1比0，以1分领先踢多1场嘅艾希拉排榜首。

艾纳斯教练鲁迪加西亚赛後表示：「C朗系足球史上最佳球员之一，我哋要尽可能为佢制造最理想嘅环境，希望佢可以享受足球，C朗好开心今场第1次同呢班队友合作。」